صبايا
الحكي للبنات الصغار بالأخص، بس الكل لازم يقرأ. بعرف انو طويل بس تحملوني.
بدي أحكي بموضوع مهم. ولو سمحتوا تقرؤوا وتسمعوا وترجعوا تقرؤوا وسيفوا وتشيروا اللي بدي أحكي.
ريديت مو للتعارف. تحكي مع حد غريب، بنت أو شب، مو آمن. تعطي حد معلومات عنك خطر.
بس أنا عارفة ولا وحدة منا بترد بس على الحكي. عارفة كل وحدة بتحكي: "بس هاي المرة"، "لا أنا غير"، "لا هاد الشب محترم"، "أنا رح أدير بالي"، وحصل الصراحة.
اعرفوا انو انا ما عم بنزل البوست عن عبث وعشان نصيحة عشوائية. عم بنزل البوست عشان صاير أشياء هون وبنات وقعوا بمشاكل وما بدنا الموضوع يتكرر.
هاد البوست رح يحكيلك كيف تديري بالك وتاخدي احتياطك مع الناس اللي بتحكي معهم أونلاين. مادام ما رح نسمع ونرد على الحكي اللي الكل بحكيلنا ياه، وما منتعلم من أغلاط غيرنا، على الأقل نعرف كيف نحمي حالنا.
أهم النقاط
ما تعطي معلومات عنك. مشششان الله ما تعطوا. أنا طلعت ناس هون من بس تلات معلومات: وين درس، كم عمره، واسمه الأول. اخطر تلات. كذبوا (هادي كذبة بيضة). لا تحكوا التخصص. لا تحكوا اسمكم. لا تحكوا الجامعة او المدرسة. لا تحكوا وين ساكنين. غيروا بعدد أفراد العائلة. مو ضروري يعرف هاي المعلومات والله العظيم. كذبوا بمعلوماتكم ولو باشي بسيط. اسمك نورا بدل نور. عمرك ٢٠ مو ٢١.
شيكي على البروفايل. لا تردي على أي حد قبل ما تشيكي عليه. بنت أو شب، لازم تشيكي. في أكتر من طريقة التشبك، وبتوقع كلنا عنا ياها.
إنتي اللي بتحطي الحدود. الشب رح يحاول دايمًا يشوف لوين حدودك. سب مسبة ما بتحبي تسمعيها؟ احكيله، بهدلي، لا تسكتي. السكوت علامة على الرضى. حكى بموضوع ما بتحبي؟ أحكيله، وقفي، احرجي. لو شو ما كان الموضوع وانتي مو مرتاحة في (ان شاء الله كان عن عيلته او عن تخصصه او عن دكتورة بالجامعة) ما عجبك؟ حطي حدود.
حتى لو بتحكي مع بنت، هي حد غريب!!!!!! ترا ريديت منغول نغل بحسابات بنات بكونوا شباب. لا تثقوا ببنت هون الا بعد فترة وبعد إثباتات حقيقية. وانا عن نفسي فش بنت حكيت معها هون حاولت تتعرف علي زيادة وتعرف مين أنا وتبعتلي صور. لو في بنت حاولت تتقرب زيادة هاد redflag. صارت تبعت صور لإلها من حالها؟ redflag. تحكيلك عن البيريود؟ redflag. ممكن أنا بزيدها، بس يا بنات trust your gut والله انتوا رح تعرفوا تحسوا من حالكم اذا انها بنت أو لا. ولا تبعتي صور او تعطي معلوماتك حتى للبنات!!!
لا تبعتي لنكات من أكاونتك الأصلي على فيس أو انستا! أي لنك بتبعتي في أخره كود بعرف عن أكاونتك. الغو اخر اشي بعد ال “?igsh=“ وإلا بروفايلكم ببين.
لا تفتحوا لنكات الفيس والانستا اللي الناس ببعتوهم من أكاونتاتكم الأصلية. رح تطلعولهم suggested ورح يعرفوا مين انتوا.
لا تحكوا مع شب بعد الساعة ١٢. هاي أنا حطيتها لحالي. انتي رح تكوني نعسانة، وهو رح يكون نعسان، والمواضيع ممكن تروح لأشياء ممكن عادةً ما تقبليها. انتوا التنين your guard will be down ورح تاخدوا راحتكم زيادة.
ما تبعتوا صوركم، حتى لو ال Profile picture تاعت انستا! يا اخي في AI بيلعب بالصور. ليش تحتاجوا تبعتوا صوركم أصلًا؟ مو ضروري يشوفك. بيقدر يتلاعب بالصور ويغيرها ويبتزك فيها. ممكن ناس يعارضوني على هاي النقطة بس أنا مستحيل أبعت صورة الي هون. مافي اي سبب بالحياة يخلني ابعت صورتي.
مافي اشي اونلاين بينمحي. برجع بكرر، ما تحكي اي اشي اونلاين ما بدك ينتشر. حتى لو سويتي ديليت. كله بيرجع. تبعتوش اشي اونلاين انتوا مو قد انو الكل يعرفه.
لو بتصيري تحسي انو مستحيل تحكي لصاحبتك المقربة عنه معناها في اشي غلط. ممكن لو بتحسي مستحيل تحكي لحد عنه حتى لبنت اونلاين معناها في اشي غلط بالموضوع.
أي صورة بتبعتيها لأي اشي بالحياة اعرفي إنها رح تتحلل. انتبهي من اي صورة فيها يافطة تورجي انتي وين، شارع معين. انتيهوا للصور كتير منيح.
ما تحكي مع حساب انعمل جديد. في سبب ليش سوا جديد. يا بخبي الحساب القديم ومصايبه، يا بده يتولدن وبدوش حسابه الأصلي يطلع عليه سمعة. اذا حساب جديد حاول يحكي معك؟ بلكي وكملي حياتك.
اوثقي باحساسك trust your gut. حتى لو ما علط باشي بس انتي في اشي مو مريحك بكون في اشي غلط عنجد! مو ضروري تكملي حكي معه. ومو ضروري تبرري. احكي ما بدي نضل نحكي وبلكي وكملي حياتك.
ازا حسيتي انك خايفة "تخسريه" وهو حس رح يستغلك. لا تسمحيله يعرف ولا تسمحيله يستعمل هاد الاشي ضدك. فش واحد بالحياة مستاهل تخافي تخسري. بدك تتركني؟ هي البلوك.
تعلمي تحكي لا. No is a full sentence. مافي داعي تبرري، وضلي زكري حالك "هاد انسان غريب" ومو مضطرة تبرريله او تحكيله اشي.
لازم يحترمك. بقدر من هون لعشر سنين يضل يمدح فيكي ويتغزل بشخصيتك. ممثل وبستاهل اوسكار . بس لما تحسي انه مش قادر يحترمك ما تكملي حكي معه.
اساليب الشباب بيستعملوها عشان يستدرجوكي او يخلوكي تثقي فيهم:
بيعطيكي معلومات عنه بالساهل. هو بحاول يحسسك بالأمان. هيو انا حكيتلك احكيلي. لا تردوا. ان شاء الله بعتلك هويته كمان. هاد الاشي غلط يا جماعة! ممكن يبعت صورته ويحكيلك عادي ما تبعتي صورتك. هاد اسلوب استدراج ويحسسك انو هو آمن وسيف وهي انتي بتعرفيني وانا ما رح أضغطتك تبعتيلي صور. وبحب اذكر انو ممكن يكزب بمعلوماته.
لما يصير يسألك عن طولك، وزنك، طريقة لبسك، اي اشي عن ملامحك الخارجية اعرفي انو عم بحاول يتخيلك.
"انتي الوحيدة اللي حكيتلها هاد الاشي." كذاب. بحاول يستدرجك. يحسسك انك حد مهم بالنسبة اله. بدو يخليكي تصدقي وتأمني عليه وتحكيله اشياء خاصة. بيحكي مع ١٠ غيرك على فكرة.
من أولها Love bombing. يخي انت ما بتعرفني شو بحبك هاي. بنات واحد يصير يحكيلك انتي اللي بتفهميني. حبيت شخصيتك. يا الله ما أحلاكي. اي اشي بيمدحك فيها مو عادي وبالذات من الأول.
التقرب بسرعة، أو يصير بده يروح لانستا او أي مكان تاني بسرعة. لا. ماله ريديت؟! مو ضروري تبعت فويس. لو بدك تحكي اشي احكي هون. مو عاجبك احكي مع غيري.
ما يحترم حدودك. حكيتيله ما بحب هاي المسبة ورجع حكاها؟ عم بحاول يشوف لو بتضلي صامدة، لو بيقدر يتلاعب بحدودك، قديش ممكن يغير فيكي ويخليكي تغيري اشياء عشانه.
ممكن يحاول يفتح معك المواضيع السيكشول بطريقة "تعليمية" او "تحذيرية من باقي الشباب". يعني ممكن يحكيلك "لا تطلعي على هاد المكان! الشغيلة في بحكوا عن البنات بطريقة غلط!" ويبلش يحكيلك شو حكوا الشباب وشو فرجوا فديوهات. هاي طريقة يفتح فيها الموضوع. لا تسمحيله.
يحكيلك عن تجاربه القديمة مع بنات ويصير يسبها. ويا بنات لما شب يحكيلك عن بنت تانية معناها ممكن يحكي عنك لبنات وشباب تانين. ولو سبها او اجى بعرضها؟ لا تكملي!!!! بلوكككك. رح يحكي عنك زي ما حكى عنها
لو انتي زعلتي منه في شباب ممكن يقلبوها وهمه يزعلوا منك ويعصبوا ويحاولوا يشوفوا لو بترجعيلهم. طريقة استدراج عشان تتعلقي في ويحسسك بالذنب.
اللي بس تحكيله انا ما حبيت انك حكيت بهاد الموضوع يحكيلك "ما سويت اشي غلط! انتي مزودتيها! انا ما غلطت معك!" هاد بده يقنعك انك انتي الزيادة ويسوي reverse psychology. ما تردي اذا انتي ما ارتحتي معناها هو غلطان. الشب المحترم بخاف وبزعل وبعتذر.
"خليها بينا اه؟ حتى صحباتك. ما حد رح يفهمنا" لو واحد بدوش ياكي تحكي عنه لحد بكون عارف انو لو حد عرف عنكم رح يحاول يوعيكي ويحكيلك اللي بصير غلط. مافي اي سبب شب يحكيلك هيك.
لو انتي تحت ال١٨، أو حتى نحكي تحت ال ٢١ والفرق بينكم كبير لا تحكي معه!!!!! هاد واحد بكون بيستدرج البنات الصغار عشان ممكن يخدعهم. واسف يا بنات بس اه انتوا بتنخدعوا بسرعة عشان ما مريتوا بتجارب بالحياة. وكيف واحد بيشتغل رح يكون في مواضيع مشتركة بينه وبين وحدة عمرها صغير؟!؟ رح يحكيلك انتي كتير واعية. يا الله شو تفكيرك أكبر من عمرك، ويكزب عليكي عشان تردي عليه. فكروا فيها، لو واحد كبير ليش ما بيحكي مع بنات كبار؟؟ عشان ولا وحدة قابلة تحكي معه! وانتوا بيضحك عليكم بكلمتين عشان تقبلوا تحكوا معه. مافي شب زلمة بالغ عاقل بيقبل يحكي مع بنت عمرها ١٨ أو أصغر. المفروض دغري يوقف وهو يحكيلك ما بيزبط نحكي. الموضوع كريبي ومقرف غير هيك!
في أنواع ممكن يحكيلك بقتل حالي لو بتتركيني. هاد بالذات كزاب. تردوش. سووا بلوك مشان الله. مو صح اللي بسووا وانتوا مو مسؤولين عن حياته. ومستحيل يسويها بحكي من تجارب شفتها حولي، ما رح يقتل حاله هاد اسلوب تعلق ويخليكي معه. ولو قتل حاله هاي مشكلته هو مش انتي، الذنب مو عليكي.
اللي بصير يحكي معك عن حالته النفسية عشان تضلي تحكي معه. ممكن يحزنك عليه عشان تصيري تحسي بالذنب انك توقفي تحكي معه. مثلًا لو حكيتيله بدي انام على ال١١ وصار يفتح موضوع يخليكي تحسي بالذنب تحكيله باي على ال ١٠:٥٠. وبضل هيك للساعة وحدة بليل. هاي طريقة يخليكي تحكي معه وكمان يتعدى حدود اللي انتي حطيتيها بدون ما تحسي.
خطوط حمراء ولا عمركم تخطوها
صور بدون حجاب لا تبعتي!!! بنت او شب لا تبعتي لا تبعتي لا تبعتي. مافي هاد الشب غير. مافي! الشب اللي قابل تبعتيله هيك صورة ناوي يستغلها.
تحكوا بمواضيع 18+ لا لا لا. صدي. بلكي. ما تحكي معه بهيك اشياء. كل اشي بتعملي اونلاين بتخزن وبتسيف وممكن يستعمله ضدك. بدك اشي انبسطتي عليه لنص ساعة يخرب حياتك ويدمرك نفسيًا؟ ما في شب محترم رح يقبل لبنت.
لو سبك أو تطاول عليكي لا تسمحيله! لو قلل من أحترامك لا تسمحيله! دغري بلكي. ما بيستاهل منك حتى تحكيله لا تطاول علي. ابعتي مسج طويل بهدلة وبلكي وطلعي من حياتك.
لو سمحتوا أقرؤوا البوست أكتر من مرة، أحفظوا اللي حكيته، حللوا لو في أي شب عم تحكوا معه هلا عم بستعمل أي من الأساليب هاي معكم. على فكرة أنا كمان رح أضل أرجع وأقرأ بوستي عشان أتذكر. كلنا مننسا، كلنا منغلط، كلنا باللحظة ما منلاحظ على حالنا. كلنا لما نكون بقلب الحدث منحكي عادي وما منقتنع ومنحس انو عادي اللي بصير.
أشي كتير مهم: اللي بصير معك، لو حكتلك صاحبتك أنو بصير معها، بتقبلي عليها؟ ولا بتوقفيها وبتحاولي توعيها وتحميها؟
يا ريت في أي حد تاني عنده نصائح أو أشياء يزيدها يكتبهم وأنا بزيدهم على البوست.
